Kinderjodelchörli Mosnang

Sit em Johr 1997 gits s’Kinderjodelchörli vo Mosnang ,
dä Dirigent und Leiter isch de Stefan Segmüller scho sit em aafang.
Ihm liit d’Nochwuchsförderig sehr am Herzä und meint:
Mit dere Grundusbildig, guete Atem und Jodeltechnik isch en wertvolle Grundstei gleit.
Das wunderschöni Bruchtum z’pfläge, isch am Stefan sini Phylosophie,
das spüret alli, egal ob gross oder chlii.
D‘Chind för de Jodelgsang chöne z‘begeistere, das isch eifach wunderbar,
es brucht viel Disziplin, Geduld und vor allem Freud…das isch klar.
Ab de 1. Klass dörfet d‘Chind im Chörli mitsinge,
ab denn wird gfiilet, probet und g’üebt bis es tuet stimme.
Die Jugendliche dörfet im Chörli sii und singä solang sie wönd,
meischtens hörets uf, wills vo de Arbet ii de Lehr, zytlich nüme chönd.
Momentan singet rund 40 Meitli und Buebe im Chörli mit,
das haltet de Dirigent Stefan Segmüller ganz bestimmt fit.
D’Chind sind vo de Gmeinde Mosnang , Kirchberg, Flawil, Necker, Oberhelfenschwil,
vo Nesslau, Wald (ZH) und au vo Wattwil.
Mitenand singä, ofenand luege und gmeinsam de Erfolg chöne erlebe,
das isch wichtig für d‘Sozialkompetenz und au för’s spötere Lebä!
Äs urchigs Repertoir pfleget mir und singet bekannti Jodellieder, wills üs gfallt,
dezue ghöret Naturjodel, Ratzliedli und au Volksliedli, för jung und alt.
Uftrette hend mir scho ii de ganze Schwiz döre,
au im Radio und Fernseh het mer üs scho öppe chöne g‘seh und g’höre.
Mer singet a Geburtstäg, Hochzig, Firmä oder Vereinsaläss, Konzert, Unterhaltigsobig und Jodlerfescht,
egal wo Sie üs wend ghöre...mer freuet üs, wenn mer dörfet singe, för Sie und Ihri Gäscht!